પનામા પેપર્સ લીક મામલે પાકિસ્તાન સુપ્રિમ કોર્ટનો આદેશ શરીફ સામે તપાસ માટે જેઆઈટી રચાશે

20-8

પનામાગેટ નામથી ચર્ચાસ્પદ પનામા પેપર્સ લીક સાથે જોડાયેલા ભ્રષ્ટાચારના મામલામાં પાકિસ્તાનની સુપ્રિમ કોર્ટે નવાઝ શરીફ અને તેમના પરિવારના સભ્યોની વિદેશમાં રહેલી સંપત્તિઓના મામલાની તપાસ માટે જોઈન્ટ ઈન્વેસ્ટીગેશન ટીમની રચના કરવાનો આદેશ કર્યો છે. જોઈન્ટ ઈન્વેસ્ટીગેશન ટીમ દ્વારા ૬૦ દિવસની અંદર અહેવાલ આપવામાં આવશે. નવાઝ શરીફ પણ જોઈન્ટ ઈન્વેસ્ટીગેશન ટીમની સમક્ષ ઉપસ્થિત થશે. તપાસ રિપોર્ટ સુપ્રિમ કોર્ટમાં રજુ કરવામાં આવ્યા બાદ મામલાની કોર્ટમાં ફરીથી સુનાવણી હાથ ધરવામાં આવશે. જેઆઈટી તપાસ સુપ્રિમ કોર્ટની દેખરેખ હેઠળ કરવામાં આવનાર છે. મીડિયા અહેવાલમાં જણાવવામાં આવ્યું છે કે પાકિસ્તાન સુપ્રિમ કોર્ટે પોતાના ચુકાદામાં કહ્યું છે કે નવાઝ શરીફને ભ્રષ્ટાચારના આરોપમાં અયોગ્ય જાહેર કરવા માટે પુરતા પુરાવા નથી. પાંચ જજની બેચે ૩-રની બહુમતી સાથે નવાઝની તરફેણમાં ચુકાદો આપ્યો હતો. બે જજ જસ્ટીસ ખોસા અને જસ્ટીસ ગુલઝાર જેઆઈટી તપાસની તરફેણમાં ન હતા. જ્યારે તેઓ નવાઝ શરીફને વડાપ્રધાન પદ માટે અયોગ્ય જાહેર કરવાના મૂડમાં હતા. આખરે બહુમતીથી આપવામાં આવેલા ચુકાદાથી નવાઝ શરીફને કામચલાઉ રાહત મળી ગઈ છે. જસ્ટીસ આશિફ ખુસારે ૩૪૦ પાનાનો આ ચુકાદો આપ્યો છે. સુપ્રિમ કોર્ટે આઈએસઆઈ, મિલેટ્રી ઈન્ટેલિજન્સ, એનએડી, એસપીસી, એફઆઈએને જેઆઈટી તપાસ માટે પોતાના અધિકારીઓના નામ સૂચવવા માટે કહ્યું છે. સુપ્રિમ કોર્ટે સાત દિવસની અંદર જેઆઈટીની રચના કરવાનો આદેશ આપ્યો હતો. પનામાગેટમાં નવાઝ શરીફ, તેમની પુત્રી મરીયમ નવાઝ, હસન નવાઝ, હુસૈન નવાઝ, શરીફના જમાઈ નિવૃત્ત કેપ્ટન મોહંમદ શફદર અને મહામંત્રી ઈશાકદાર ઉપર ભ્રષ્ટાચારના આક્ષેપો મુક્યા હતા. શાસક પીએએમએલ-એન દ્વારા સુપ્રિમ કોર્ટના ચુકાદાનું સ્વાગત કરવામાં આવ્યું છે. બીજી તરફ વિપક્ષી પાકિસ્તાન તહેરીકે ઈન્સાફ પાર્ટીએ નવાઝ શરીફને ન્ૌતિકતાના આધાર પર રાજીનામું આપી દેવાની માંગ કરી છે. નવાઝ શરીફ વડાપ્રધાન રહેશે તો જેઆઈટી સ્વતંત્ર રીતે તપાસ કરી શકશે નહીં તેવી માંગ કરી હતી. પનામા પેપર્સ લીક મામલામાં નવાઝ શરીફ અને તેમના પરિવારના સભ્યો પર વિદેશમાં બિનહિસાબી સંપત્તિ રાખવાનો આક્ષેપ કરાયો હતો.

Leave a Reply

Your email address will not be published. Required fields are marked *